Euskaraz.net

- Euskaraz mintzatu nahi duen jende gehiago dagoelako

Pandemia garaiak gainera, areagotu egin du bidelarien eskaera. Gero eta gehiago dira euskaraz online eta doan aritzeko izena ematen duten bidelariak.

- Euskara ikasten ari eta praktikatu gura dutelako

Berdin du noiz, berdin du nondik eta zertarako. Kontua euskaraz aritzeko aukera izatea da, eta horretan mintzanet sareak frogatu du, euskara ikasi eta euskaraz aritu nahi duenarentzat tresna ezin hobea dela. Une honetan ere, badaude bidelagunen zain dauden bidelariak, eta horretarako bidelagun gehiago lortzeko ahaleginean ari dira.

- Munduan euskaraz aritu nahi duten lagunak ditugulako

Euskal Herriko hiztunak dira mintzanet proiektuko asko eta asko, baina ugariak dira munduko hainbat txokotatik asteroko hitzordua egiten duten mintzanet kideak. Teknologia berriak baliatuz, astean ordubete gutxienez bidelagunarekin aritzen dira solasean.

- Euskal Herrian euskaraz mintzatzeko beharra eta eskubidea dugulako

Gero eta gehiago gara euskaraz bizi nahi dugula esaten dugunok, eta euskara hitz eginez egiten dugu geure eskubide hori. Euskal Herrian euskaraz hitz egiteko aukera bat gehiago da mintzanet, eta horretan ari dira ehunka bidelagun eta bidelari, astez aste.

- Ikasi arren mintzatzeko premia eta gogoa dutelako askok

Euskaltegian, barnetegietan… ahalegin handia egiten dute euskara ikasi nahi dutenek. Ikasi eta mintzatzea da hizkuntza baten baldintza. Eta premia eta gogo hori asetzeko sortu zen mintzanet. Prozesu hori errazteko, eta astero pantailako lagunaren bitartez urratsak emateko, ikasia praktikan jartzeko, euskaraz mintzatzeko.

Horregatik, hazkunde une honetan bidelagun gehiago behar ditu mintzanet sareak. Zuk ere parte hartu nahi baduzu, jar zaitez harremanetan. Laguntzeko prest zaude?

HAMARKADA BAT SAREAN

Mintzanet 2012. urtearen amaieran sortu zen. Euskara online eta doan praktikatzeko sortutako tresna honek ahalik eta zerbitzu onena ematea erabiltzaileei, eta erabiltzailekopurua handitzea.

Mintzanet egitasmoaren helburu nagusia euskararen erabilera sustatzea da. Horretarako, euskaraz ongi dakien pertsona (bidelaguna) eta euskara-maila hobetu nahi duena (bidelaria) elkartzen dira Internet bidezko elkarrizketak egin ditzaten.

Euskaraz hitz egiteko aukera eskaintzeaz gain, bestelako ondorio positiboak ere baditu mintzanet proiektuak: mugak gainditzea (distantzia, bakartze linguistikoa edota partaideek izan ditzaketen arazo fisikoak edo denbora-eragozpenak), askotariko euskaldunen arteko elkar ezagutza sendotzea, eta, azken batean, euskaldunen kopurua handitzea