Ez esan niri
izar ostadarra dariela zure begiek
ez esan niri
lilien usaina dariola zure gorputzak
ez ezer esan niri
baina beude zurekin
izar eta liliak
zure izenaren magia osatuz, Aiodi.
Ez esan niri
gari heldu azaoa dirudila zure ileak
ez esan niri
masusta lizun ardoa dadala zure farrak
ez ezer esan niri
baina beude zurekin
gariak ta masustak
zure aurpegi ederra margotuz, Aiodi.
Ez esan niri
oreinen grazia daramatela zure oinek
ez esan niri
xori hegaldian darraiela zure besoak
ez ezer esan niri
baina beude zurekin
oreinak ta xoriak
zure gorputz liraina eratuz, Aiodi.
Ez esan niri
pasio indarra darabiltela zure keinuek
ez esan niri
intzentsu errea daukatela zure bularrek
ez ezer esan niri
baina beude zurekin
pasio ta intzentsuak
zure larru epela atonduz, Aiodi.
Ez esan niri
amurantearen orrua ito dezala kredoak
ez esan niri
desioen eztena ebaki dezala iraupenak
ez ezer esan niri
eta beude zurekin
amodio ta desioak
gure historia xamurra bizituz, Aiodi.