Donostiako euskal idazleak

Bilatu

Bilaketa Kronologikoki

Mugarrien garraioan

Egiguren, RafaSusa, 1986 Poesia

Aurkezpena

        Ez dakigu traizioz ala zurrunbiloz izan ote den, baina berriro ere harrapatu dute poesiaren kilimek Rafa Egiguren hernaniarra beren armiarmasare fatidikotan Gogoratzen dugu oraindik Ustela sailean plazaratutako mokadu tintatsu hura, «Txipiroiren bat edo beste» bere lehen poema liburukoa, Joxemi Zumalaberen ilustrazioak ta guzti.

        Eta oraingoan. eskuartean daukazun «Mugarrien garraioa», bigarrena, (Joxemi Zumalaberen azala ta guzti), Susa bere ohiturazko susara batetan somatzean harrapatu zuen halako batean, eta beraren plazertzeko «amuarrainak Anjerusari / korapilo bat egin dio / tanpaxaren mutturrean» guztion poesiarako kokoteko konpartimenduak zirikatzea lortuz bidenabar. Eta ez hori bakarrik, oraintsu arte jakin nahi genuena eta mikroskopiotan ageri ez zena ere berak deskubritu bait digu: «mina gustatzen zaio / gure dragoiari piperra», gisa honetan aspaldi galdutako gure antiojuak berreskuratu dizkigularik, alajaina. Ez ezazula pentsa ordea obsesionaturik ari gatzaizkizunik, badakigu eta Rafa Egigurenen liburuko orriok irakurriz gero ez zaituztela pakean utziko, susazale madarikatu alena! Ze zure azkazaletan geratuko zaizkizun poema sorginduek... «txangurru bati bezala, / zuri ere, / azken funtsetaraino / urrupatuko dizkizute / adimenaren tarte / goxuenak».

Pasartea

Inork baino hobeto bazekien ere

nongo taktika-plani

zuritu behar zizkion barandauak,

ihes aldiaren izkina batean

itsutu zuten paretaren kontra.

 

Kilkerrak eta ipurtargiak

gustatzen zitzaizkion

bere kuartoko tetxuan eta

Vietnamgo mapa zabaltzen zuen

gertuagotik jarraitzeko Vietcong.

 

Nahiz argazki aereo hartan

tamaritzen arrasto gutxi,

garai hartako enziklopediak

hiruzpalau koloretako ekuazioak

erakusten zizkion bakarrik.

Idazlearen beste liburu batzuk

Atzera