Donostia Antzerki Saria

 

Euskarazko antzerki profesionala sustatzeko eta indartzeko asmoz sorturiko saria da. Urtero, martxoaren 27an, Antzerkiaren Nazioarteko Egunean antolatzen den ekitaldian ematen zaio saria aurreko urtean Donostian eskainitako antzerki lan onenari. Egun horretan ikuskizun saritua eskaintzen da Victoria Eugenia antzokian.

 Donostiako Udaleko Euskara Zerbitzuaren eta Donostia Kulturaren elkarlanari esker, Donostiako ohiko antzerki programazioan euskarazko antzerkiaren eskaintza egonkortzea lortu da eta ikuskizun bakoitzetik euskarazko bi emanaldi gutxienez eskaintzen dira Donostiako antzokietan.

Sariaren ezaugarriak

Saria

12.000 € eta euskal artista baten artelan bat

Sarian parte hartzeko baldintzak
  • Donostian aurreko urtean programatutako ikuskizuna izatea
  • Euskarazko ikuskizuna izatea (testurik gabekoak ez dira sartuko)
  • Talde/konpainia profesionalek eskainitako ikuskizuna izatea
  • Helduei zuzendutako ikuskizuna izatea
  • Aretoetarako ikuskizuna izatea
Saria onartzeko baldintza

Saria onartzeak ekarriko du talde irabazlearen aldetik hiru urteko epean Donostian euskarazko ikuskizun berri bat eskaintzea.

Ordaintzeko modua

  • Saria ematen den egunean taldeari 10.000 euro ordainduko zaizkio.
  • Egun horretan eskainiko den talde irabazlearen ikuskizunaren katxeta ere ordainduko zaio.
  • Sariaren beste 2.000 euroak, euskarazko ikuskizun berria Donostian eskaini eta gero ordainduko zaizkio. Hiru urteko epea du horretarako.
Epaimahaia

-EABko ordezkaria
-EHAZEko ordezkaria
-Antzerki kritikoa
-AISGEko ordezkaria
-EKEko ordezkaria
-Antzerki alorreko ordezkaria
-Publikoaren ordezkariak (2)
-Euskara Zerbitzuko ordezkaria (idazkari lanetan, botorik gabe)
-Donostia Kulturako ordezkaria (botorik gabe)

"7ak bat" antzezlanak irabazi du XX. Donostia Antzerki Saria

"7ak bat" antzezlanak lortu du Donostiako Udaleko Euskara Zerbitzuak eta Donostia Kulturak antolaturiko XX. Donostia Antzerki Saria. Lan hori da 2019an helduentzako Donostian antzerki konpainia profesional batek euskaraz eskainitako antzezlanik onena.

ATX konpainiak 12.000 euro jasoko ditu eta Amable Ariasen artelana. Donostiako Udaleko Euskara Zerbitzuak eta Donostia Kulturak urteak daramatzate euskarazko antzerkigintza sustatzen. Datuek agerian uzten dute egindako ahalegina eraginkorra izaten ari dela: 2019an Donostian helduentzako 14 antzerki lan eta 48 emanaldi eskaini ziren eta, guztira, 9.522 ikusle izan ziren emanaldi horietan. Ikusleei dagokienez, 2019koak inoizko daturik onenak dira (2016koak salbuetsita, urte hartan kultur hiriburutza dela eta, ezohiko programazioa eskaini baitzen) eta kontuan hartu behar da ez dela egon 2019an baino emanaldi gehiago eskaini den urterik.

 

Euskara Zerbitzuko eta Donostia Kulturako elkarlana

Donostia Kulturak eta Donostiako Udaleko Euskara Zerbitzuak hitzarmena sinatu zuten 2000. urtean Donostian Antzerki Saria antolatu eta helduentzako euskarazko antzerkiaren eskaintza sustatu eta egonkortzeko. Harrezkero, urtero berritu dute hitzarmen hori eta eskaintza areagotzen saiatu dira, betiere urteko ekoizpena kontuan hartuta. Atzera eginez gero, argi dago hitzarmena eraginkorra izan dela euskarazko antzerkiaren presentzia nabarmentzeko Donostian. 2000. urtetik hona eskaintzak gora egin du eta ikuslearen erantzuna ere hobetzen joan da: 2000. urtean 13 emanaldi eta 2.456 ikusle izatetik, 2019an 48 emanaldi eta 9.522 ikusle izatera.

 

7ak bat, gaiztoetan gaiztoenak, gizakiaren gaiztakeriari buruzko satira ausarta

Zazpi bekatu kapitalak eta orokorrean bekatuaren ideia kontuan hartuta, gizakiaren gaiztakeriaz hitz egiten da satira ausart, fresko, eta dibertigarri honetan. Donostia Antzerki Sariko epaimahaiarentzat “7ak bat” antzezlana berezia da sorreratik, antzezleak beraiek elkarlanean sortutakoa baita. Epaimahaiaren esanetan, sortzeko erak berak eragina izan du eta igarri egiten da antzezlanean, sinesgarritasuna eta indarra ematen baitio.

Martxoaren 27ko manifestua

 

Azken edizioak

 

Donostiako Udaleko Euskara Zerbitzua eta Donostia Kulturak Donostia Antzerki Saria sortu zuten 2001ean euskarazko helduentzako antzerki profesionala sustatzeko asmoarekin.

Hemen aurkituko dituzu azken edizioak irabazi dituzten antzerki lanak.

18. Antzerki Sariari buruzko informazio gehiago lortzeko

17. Antzerki Sariari buruzko informazio gehiago lortzeko

16. Antzerki Sariari buruzko informazio gehiago lortzeko

15. Antzerki Sariari buruzko informazio gehiago lortzeko

14. Antzerki Sariari buruzko informazio gehiago lortzeko

13. Antzerki Sariari buruzko informazio gehiago lortzeko

Itzuli