AMALE, begitatik biotzerako bidea errez arki dezaken 19 urteko neskatil polita. Itz gutxikoa. 10'ean exerita bere lanean ari da. Ordezkariaren makinidazlea baita.
ZIRILO, 30 inguruko otseña. Bizkarrezur bigunekoa. Itz-ontzia, zurikatzallea. Nagusiaren konfiantzakoa.
ZIRILO.- (1'etik eskutitz pillarekin). Egunon beza, etxe ontako pitxirik politenak.
AMALE.- (bere lanean). Baita zuk ere.
ZIRILO.- (eskutitzak banaka banaka aztertu ta 3'an, idatzotzaratxoan utziaz). ¿Gaur ere ez al dator ordezkari jauna?
AMALE.- Ez da beintzat oraindik azaldu.
ZIRILO.- Ez, batzuetan gauza abek, bereala pasatzen ezpadira, luze jotzen dute.
AMALE.- ¡Gizona! Goiz esnatuko ziñan gaur, ez?
ZIRILO.- Bai ba, orra. ¿Zertan igarri didazu?
AMALE.- Iñoiz baño argiago baitzatoz...
ZIRILO.- ¡Ai ene! Ogei urte banitu... Zu bezelako emakumetxoa bear nuan nik, zu bezelakoa. ¡Ai ene!
AMALE.- Asko da...
ZIRILO.- (bere buruari egingo balio bezela). Baña bai, iretzat egongo uan gure neskatilla... Aurreragokorik bazebilkik inguruan.
AMALE.- (legor). ¿Betiko leloa al degu orain ere?
ZIRILO.- Begien aurrean dagona ezin ba ukatu, biotza. ¿Zertarako eman digu Jaunak doai...
AMALE.- (moztuaz). Goiz guzian emen egoteko asmoa al dezu? Ez didazu lanean uzten, gizona.
ZIRILO.- Oraindik ez daramat minutu bat ere, pinpilinpauxa, etzaitez asarretu. Egiak ez du beñere iñor mindu bear, batez ere onen gozoa danean. Ogeitabost durokin ezin bizirik, arrastaka ibilli bearrean, dirua parra-parra...
AMALE.- (zutiturik). Begira, zu ezpaldinbazuaz, nik aldegingo det.
ZIRILO.- ¿Ez dezu entzun nai, erregintxo? Tira ba, ixilduko naiz. Ondo dakizu nere izenari dagokion bezelakoxea naizela.
AMALE.- ¡Jesus! (esanda exeri bedi).
ZIRILO.- Nere aitabesotakoak bazekien bai zer egiten zuan. Zirilo, nai dekenean ziri ta bear danean lo.
AMALE.- Jainkoaren izenean, gizona, utzi nazazu pakean.
IMANOL, 26 urteko ontziburua, kapitana. Mutil argia, egokia.
ITZIAR, 24 urteko neskatilla. Ontzijabearen alaba. Imanol'en andregaia.
IMANOL.- (1'etik Itziar'ekin sartuaz). Jainkoak egunon digula.
AMALE eta ZIRILO.- (batera). Baita zeuei ere / Baita beoi ere.
IMANOL.- (Amale'ri). ¿Azkarreta jauna ez al da emen?
AMALE.- Lau egun abetan ez da lanera etorri.
ZIRILO.- (muturra sartu naiean). Ez, jauna, gaxo egon bear du. Lengo astean otzikara...
IMANOL.- (len bezela Amale'ri). ¿Nork egiten du orain aren ordezkotza?
ZIRILO.- (Amale'ri aurrea artuaz). Nagusi jaunak berak nai izaten du. Ez dio beste iñori ontan sartzen uzten.
IMANOL.- Aizu, Zirilo.
ZIRILO.- (atentzioa bereganatu duanean pozik). Agindu, jauna...
IMANOL.- ¿Koldo'ri esan nai al diozu Newcastle'ra bialdu nai duana gertutzeko?
ZIRILO.- ¿Bereala juatea nai al du?
IMANOL.- Bai, bai.
ZIRILO.- Beorrek agintzen duna... (Bizkarra makurtu ta bijua 1'etik. IMANOL'ek eskua jasoko du «Ia bein ixiltzen aizen» balio bezela. AMALE'k parriritzia).
ITZIAR.- ¡Aj! ¡Ori gizon betegarria!
IMANOL.- (aren bizkarmakurtzeak egiñaz). Bizkarrezurreko muelleak ondo engrasatuyak ditu beintzat. ¡Zurikatzalle arraioa! (AMALE'k par egin beza).
ITZIAR.-¡Nagatu egiten nau! Ez dakit nik nola izan dezaken orren gogokoa nere aitak.
IMANOL.- Zure aitak... Obe det ixilik egon... Amale, ¿nagusiak berak al ditu giltzak?
AMALE.- Bai, jauna. Ez lizkioke iñori utziko.
IMANOL.- ¿Laster etorriko da noski?
ITZIAR.- Arritzekoa da oraindik etorrigabea izatea.
AMALE.- Bai, bestetan garai ontarako emen izaten da. (Ari dan lana bukatu ta jeikiaz). Barkatu, ezer agintzen ezpadidazu barrena sartu bearra det.
IMANOL.- Ez, ez, guregatik bazuazke. (Bijoa AMALE 2'tik). Giltzik gabe ez daukat ezer egiterik. (Eskumuturreko erlojuari begiratuaz). Baldinbait ere bereala etorriko al da zure aita.