Euskaraz.net

Kubo Kutxa aretoak Presentziak Absentziak aurkeztuko du, aurtengo bigarren erakusketa, zeinetan aukera baitugu Javier Pérezen (1968, Bilbo) unibertso pertsonalean murgitzeko.

Javier Pérezen obren bereizgarri nagusietako bat sinkretismoa da, bai prozedurei dagokienez bai erabiltzen dituen materialei dagokienez ere: eskultura, argazkia, marrazketa, bideoa eta performancea modu independentean erabiltzen ditu, eta batera, interakzioa eta ikerketa funtsezko ezaugarri dituzten instalazioak sortzeko.

Bere ibilbidean zehar, orotariko euskarriak erabili ditu: material organikoak, hala nola hesteak, larrua, zaldi-zurda, pergaminoak, latexa eta krisalidak; hauskorrak, beira edo portzelana, adibidez; eta solidoak, brontzea eta marmola, esaterako. Denei eskatzen dizkie artistak arrisku tekniko handiko egoerak, baina aukera paregabea ematen diote erabateko askatasunez mugitzeko bere sorkuntza-prozesuan.

Bere obrarekin, giza izateari buruz egin dituen ikerketak eta gogoetak erakusten ditu Javier Pérezek, metafora ugariko eta sinbolismo handiko hizkuntza baten bidez. Haren lanek atxikita dute dialektika, eta agerian uzten dute zein ahulak izan daitezkeen itxuraz elkarri kontrajarriak diren kontzeptuen arteko mugak; adibidez, naturala eta kulturala, barnekoa eta kanpoa, bizitza eta heriotza kontzeptuen artekoak. Fluktuazio ziklikoen ideia, zirkulartasuna, denborazkotasuna eta «inpermanentzia» dira artistaren ohiko gaietako batzuk.

• Datak: 2022ko ekainaren 11 – irailak 25
• Ordutegia: asteartetik igandera 12:00-14:00 eta 16:00-20:00
• Komisarioa: Alfonso de la Torre
• Sarrera doakoa
• Jarduerak: Doako bisita gidatuak larunbatetan (17:30ean euskaraz)

Bisita gidatua Ruth Orkin (1921-1985) artistaren Denboraren ilusioa erakusketara. Erakusketa ikusgai dagoen azaroaren 6 arte Kutxa Kultur Artegunean.

Erakusketak amerikar argazkilariaren ibilbidea berreskuratzeko aukera eskaintzen du, haren lan ezagunenez haratago.

-Lekua: Kutxa Kultur Artegunea (0. solairua. Tabakalera). Donostia / San Sebastián
-Doako bisita. Plaza mugatuak. Igandero, 17:30tan.
-Beharrezkoa erreserbatzea: T- 943 251937 |  aretoan bertan | hezkuntza_artegunea@kutxakulturartegunea.eus

Deskargatu hemen erakusketa-gida

Gaur egun Gipuzkoako ibai eta itsasadarretatik ia desagertuta dagoen arren, izokina (salmo salar) garrantzia handiko espeziea izan da Euskal Herriko ekonomian. Maila desberdinetako hainbat gizarte-talde eta eragile mendez mende saiatu izan dira baliabide preziatu hau aprobetxatzen, arrainaren bizitza-ziklo bereziari egokitutako arrantza-teknikak eta egitura espezializatuak diseinatuz. Horrek, jakina, gatazka ugari ere ekarri izan ditu. Hitzaldi honetan historia hori izango dugu aztergai, Gipuzkoako ibai eta itsasadarretan ezarriz arreta. Gonbidapena luzatzen diegu, beraz, interesatu guztiei, gurekin batera sarea botatzera hurbil daitezen.

Josu Narbarte arkeologoa da, EHUko doktore eta Aranzadi Zientzia elkarteko kidea. Bere ikerketa paisaia kulturalen bilakaera historikoan zentratu da, prozesu horietan giza zein ingurugiro faktoreen azterketa uztartuz. 2019tik, euskal kostako estuarioen inguruan ari da lanean, Eusko Jaurlaritzak diruz lagundutako proiektu bati esker.

Iñaki Sanz Azkue Biologian lizentziatua eta Aranzadi Zientzia Elkarteko kidea da. Herpetologiako zein botanikako hainbat arlotan lan egin du. 2006tik ondare naturalaren eta ahozko ondarearen ezagutza eta kontserbazioari loturiko jakintza alor anitzeko hainbat proiektutan lan egiten du eta koordinatzen ditu.

Komisarioa: Jon Cazenave.

3X4=Orain. Musika, zinema eta literatura argazki liburuan erakusketak Gabriela Cendoya Bergareche Bildumako 12 argazki-liburu ditu abiapuntu, historikoak eta garaikideak, eta beste hainbeste artistari eskaini zaizkie, hiru diziplinetako bakoitzeko lau artistari, beren analisia eskaini eta begirada partekatu dezaten. Hurbilketa askotariko eta anitz bat egin da errealitate horretara, zinema, musika eta literatura argazkiekin eta liburuekin erlazionatuta.

Komisarioaren hitzetan, "argazki-liburua argazkiz osatutako liburu bat baino gehiago da, objektu artistiko bat da; irudiek izaera autonomoa galtzen dute, eta edukien sekuentzia batean egituratzen dira, asmo narratibo eta erritmo bisual bakarrarekin, beste formatu batean errepikatu ezin den sormenezko diskurtso bat eraikitzen duena".